കൊച്ചി: റേഷന് വിതരണത്തിന് കേന്ദ്ര സര്ക്കാര് ആധാര് നിര്ബന്ധമാക്കിയെന്ന പേരില് സാധാരണക്കാരെ വലയ്ക്കാനൊരുങ്ങി സംസ്ഥാന പൊതുവിതരണ വകുപ്പ്. ഈ മാസം 30നകം ആധാര് നമ്പര് നല്കാത്തവര്ക്ക് സബ്സിഡി നിരക്കില് റേഷന് നല്കാനാകില്ലെന്നാണ് സംസ്ഥാന സര്ക്കാരിന്റെ നിലപാട്. അതേസമയം ഭക്ഷ്യ ഭദ്രതാ നിയമം നടപ്പിലാക്കാത്തതിന്റെ വീഴ്ച മറയ്ക്കാനാണ് സംസ്ഥാനത്തിന്റെ നീക്കമെന്നും സൂചനയുണ്ട്.
ഈ മാസം മുപ്പതിനകം ആധാര് നമ്പര് നല്കാത്ത ഗുണഭോക്താക്കള്ക്ക് റേഷന് നല്കില്ലെന്ന് സിവില് സപ്ലൈസ് വകുപ്പ്. കേന്ദ്ര ഭക്ഷ്യ മന്ത്രാലയത്തിന്റെ അറിയിപ്പിന്റെ അടിസ്ഥാനത്തിലാണ് നടപടി. ആധാര് നമ്പര് രേഖപ്പെടുത്തി അതിന്റെ സാധുത ഉറപ്പ് വരുത്തി മാത്രമേ റേഷന് സാധനങ്ങള് നല്കാവൂ എന്നാണ് ഭക്ഷ്യ മന്ത്രാലയം നിര്ദ്ദേശം നല്കിയിരിക്കുന്നത്.
ഇതിന്റെ അടിസ്ഥാനത്തില് സെപ്റ്റംബര് മുപ്പതിന് ശേഷം ആധാര് ലഭ്യമാക്കിയ ഗുണഭോക്താക്കള്ക്ക് മാത്രമായിരിക്കും സബ്സിഡി നിരക്കില് ഭക്ഷ്യധാന്യം നല്കുക. ആധാര് ലഭ്യമാക്കിയവരുടെ പട്ടിക എല്ലാ റേഷന് കടകളിലും ലഭ്യമാക്കുകയും ചെയ്യും.പൊതുവിതരണ മേഖലയില് സുതാര്യത ഉറപ്പാക്കാനാണ് കാര്ഡിലെ അംഗങ്ങളുടെ ആധാര് നമ്പര് ശേഖരിക്കുന്നത്. ഇതുവഴി റേഷന് സാധനങ്ങളുടെ ചോര്ച്ചയും ദുരുപയോഗവും തടയാനാകുമെന്നാണ് അധികൃതരുടെ കണക്കു കൂട്ടല്.