കൊച്ചി : മുഖ്യമന്ത്രി പിണറായി വിജയനെതിരെ രൂക്ഷ വിമര്ശനവുമായി ഇടത് സഹയാത്രികനും മുന് എംപിയുമായ സെബാസ്റ്റ്യന് പോള്. ഭരണ വീഴ്ചകളുമായി ബന്ധപ്പെട്ട് മുഖ്യമന്ത്രി നടത്തിയ കുറ്റസമ്മതങ്ങളിലേറെയും ആഭ്യന്തര വകുപ്പിനെപ്പറ്റിയായിരുന്നുവെന്ന് സെബാസ്റ്റ്യന് പോള് പറഞ്ഞു. സര്ക്കാരിന്റെ ഭരണനേട്ടങ്ങള് ജനങ്ങളിലേക്കെത്തുന്നില്ലെന്ന പരാതി മുന്നണിയില് പോലുമുണ്ട്. സിപിഐയുടെ ആരോപണങ്ങള് തെറ്റ് തിരുത്തലിനുള്ള അവസരങ്ങളായി കണ്ടാല് മതിയെന്നും അദ്ദേഹം കൂട്ടിച്ചേര്ത്തു.
സംസ്ഥാന സര്ക്കാര് ഒന്നാം വാര്ഷികം ആഘോഷിക്കെയാണ് പിണറായി വിജയനെ ലക്ഷ്യമിട്ട് സെബാസ്റ്റ്യന് പോളിന്റെ കടന്നാക്രമണം. ഭരണകാര്യങ്ങളില് വന്ന വീഴ്ചകളുടെ പട്ടികയില് മുഖ്യമന്ത്രിയുടെ ആഭ്യന്തര വകുപ്പാണ് മുന്നില്. മഹിജ സംഭവമടക്കം ഇതിന് ഉദാഹരണമാണ്.സര്ക്കാരിന്റെ ഭരണ നേട്ടങ്ങള് ജനങ്ങളിലേക്കെത്തുന്നില്ലെന്ന പരാതി ഭരണമുന്നണിക്കകത്ത് തന്നെ വ്യാപകമായുണ്ട്. ഇതിനുള്ള കാരണം കണ്ടെത്തി പരിഹരിക്കുന്നതിന് പകരം കുറ്റം മാധ്യമങ്ങളുടെ മേല് ആരോപിക്കുന്നത് ശരിയല്ല.
നിയമസഭയില് ചോദ്യങ്ങളോട് നിഷേധാത്മക സമീപനം സ്വീകരിക്കുന്ന രീതിയെ അംഗീകരിക്കാനാകില്ലെന്നും ഇക്കാര്യത്തില് സ്പീക്കര് ശാസിക്കേണ്ടി വന്നത് ഗൗരവതരമാണെന്നും സെബാസ്റ്റിയന് പോള് വ്യക്തമാക്കി. ഇതിനിടെ സിപിഐ നടത്തുന്ന പ്രസ്താവനകള് ശരിയായ അര്ത്ഥത്തിലെങ്കില് നല്ലത് തന്നെയാണെന്ന് അദ്ദേഹം അഭിപ്രായപ്പെട്ടു. സര്ക്കാരിന് മൃഗീയ ഭൂരിപക്ഷമുണ്ടെന്നിരിക്കെ ഒരു തിരുത്തല് ശക്തി ആഭ്യന്തരമായി പ്രവര്ത്തിക്കുന്നത് ഗുണകരമാണ്. വ്യത്യസ്തമായ വീക്ഷണം സര്ക്കാരും ജനങ്ങളും അറിയണമെന്നും തെറ്റ് തിരുത്തലിന് ഇത് അത്യന്താപേക്ഷിതമാണെന്നും സെബാസ്റ്റ്യന് പോള് കൂട്ടിച്ചേര്ത്തു.