ഇൻഡോർ: ഇന്ത്യൻ പ്രീമിയർ ലീഗിൽ റോയൽ ചലഞ്ചേഴ്സ് ബാംഗ്ലൂരിനെതിരെ കിംഗ്സ് ഇലവൻ പഞ്ചാബിന് 8 വിക്കറ്റ് ജയം. വിജയലക്ഷ്യമായ 149 റൺസ് 5.3 ഓവർ ബാക്കി നിൽക്കേയാണ് പഞ്ചാബിന്റെ ജയം.
21 പന്തിൽ നിന്ന് 34 റൺസ് നേടിയ മനൻ വോറയുടെയും, 38 പന്തിൽ 58 റൺസ് നേടിയ ഹാഷീം അംലയുടെയും 22 പന്തിൽ നിന്ന് 43 റൺസ് നേടിയ ഗ്ലെൻ മാക്സ് വെല്ലിന്റെയും പ്രകടനമാണ് പഞ്ചാബിന്റെ ജയം അനായാസമാക്കിയത്.
ടോസ് നേടി ആദ്യം ബാറ്റിംഗ് തെരഞ്ഞെടുത്ത ബാംഗ്ലൂരിന് നിശ്ചിത ഓവറിൽ നാല് വിക്കറ്റ് നഷ്ടത്തിൽ 148 റൺസെടുക്കാനേ സാധിച്ചുള്ളൂ. കൃത്യതയോടെ പന്തെറിഞ്ഞ പഞ്ചാബ് ബൗളർമാർക്ക് മുന്നിൽ റോയൽ ചലഞ്ചേഴ്സിന്റെ മുൻനിര തകർന്നെങ്കിലും ഒരറ്റത്ത് പിടിച്ചു നിന്ന എ ബി ഡിവില്ലിയേഴ്സിന്റെ ബാറ്റിംഗ് മികവാണ് ബാംഗ്ലൂരിന് ഭേദപ്പെട്ട സ്കോർ സമ്മാനിച്ചത്.
46 പന്തിൽ നിന്ന് 89 റൺസാണ് ഡിവില്ലിയേഴ്സ് അടിച്ചെടുത്തത്. 9 സികസറുകളും മൂന്ന് ബൗണ്ടറികളുമടങ്ങിയതായിരുന്നു ദക്ഷിണാഫ്രിക്കൻ താരത്തിന്റെ ഇന്നിംഗ്സ്. ഇന്നിംഗ്സ് ഓപ്പൺ ചെയ്ത മലയാളി താരം വിഷ്ണു വിനോദിന് 7 റൺസെടുക്കാനേ സാധിച്ചുള്ളൂ.