എഫ് എ കപ്പിൽ ലെസ്റ്റർസിറ്റിയെ എതിരില്ലാത്ത ഒരുഗോളിന് തോൽപ്പിച്ച് മിൽവാൾ ക്വാർട്ടർ ഫൈനലിൽ പ്രവേശിച്ചു. മറ്റൊരു മത്സരത്തിൽ വാൻഡേഴ്സനെതിരെ ചെൽസിയും വിജയിച്ചു. സ്പാനിഷ് കപ്പിൽ റയൽ മാഡ്രിഡിനും അത് ലറ്റികോ മാഡ്രിഡിനും വിജയം.
90-ാം മിനിട്ടിലെ അപ്രതീക്ഷിതമായി ലെസ്റ്റര് സിറ്റിയുടെ ഗോൾമുഖത്തേക്ക് ഇരച്ചുകയറിയ പന്ത് മിൽവാളിന് സമ്മാനിച്ചത് എതിരില്ലാത്ത ഒരു ഗോളിന്റെ വിജയം. ലീ ഗ്രിഗറിയുടെ പാസ് മിൽവാളിന്റെ ഷോൺ കുമ്മിംഗ്സ് സെന്റർ ബോക്സിൽ നിന്നും തൊടുത്തുവിട്ടത് ലക്ഷ്യം കാണുകയായിരുന്നു.
പ്രീമിയർ ലീഗ് ചാമ്പ്യൻമാരായ ലെസ്റ്റർസിറ്റിക്കെതിരെ നേടിയ വിജയം എഫ് എ കപ്പിന്റെ ക്വാർട്ടർ ഫൈനലിലേക്കുള്ള വഴിയും മിൽവാളിന് തുറക്കുകയായിരുന്നു.
പ്രീമിയർ ലീഗിൽ മിന്നും പ്രകടനം കാഴ്ചവച്ച ചെൽസിയ്ക്ക് ക്വാർട്ടർ ഫൈനൽ വഴി തുറന്നു വാൻഡേഴ്സിനെതിരായ വിജയം. ഗോൾ രഹിത ആദ്യപകുതിയിൽ നിന്നും കണ്ടത് ചെൽസിയുടെ അപ്രതീക്ഷിത മുന്നേറ്റം. 65 ആം മിനിട്ടിലായിരുന്നു ചെൽസിയുടെ ആദ്യ ഗോൾ. വില്യനിന്റെ പാസ് അതിസമർത്ഥമായി പെഡ്രോ ഹെഡ് ചെയ്യുകയായിരുന്നു. 89 ആം മിനിട്ടിൽ ഡിയാഗോ കോസ്റ്റയുടെ ഗോളുകൂടി പിറന്നതോടെ വാൻഡേഴ്സ് പരാജയം മണത്തു.
മറ്റൊരു മത്സരത്തിൽ ലിങ്കൺ സിറ്റി ബെൺലിയെ ഒരു ഗോളിന് തോൽപ്പിച്ചപ്പോൾ ഹഡ്സ്ഫീൽഡ് മാഞ്ചസ്റ്റര് സിറ്റി മത്സരം സമനിലയിൽ കലാശിക്കുകയായിരുന്നു.
സ്പാനിഷ് കപ്പിൽ എസ്പ്യാനോളിനെതിരെ റയൽ മാഡ്രിഡിന്റെ വിജയം എതിരില്ലാത്ത രണ്ട് ഗോളുകൾക്കായിരുന്നു. മറ്റൊരു മത്സരത്തിൽ സ്പോര്ട്ടിംഗ് ഗിജോണിനെതിരായ അത് ലറ്റികോ മാഡ്രിഡിന്റെ വിജയം ഒന്നിനെതിരെ നാല് ഗോളുകൾക്കായിരുന്നു.