കയറ്റം കയറി വരുന്ന ഫോർച്യൂണറിനെ കാണാൻ തന്നെ ഒരു ലുക്കാണ് . ആരാടാ എന്നോട് പോരിനു നിൽക്കാൻ എന്ന ഭാവം . ആരും കൊതിക്കുന്ന പൗരുഷം . വാഹന പ്രേമികളുടെ മനം കവർന്ന ഫോർച്യൂണർ ഈ നവംബർ ഏഴിനു പുതിയ രൂപത്തിൽ പുതിയ ഭാവത്തിൽ നിരത്തിലെത്തും .
ടൊയോട്ട ഇന്നോവ ക്രിസ്റ്റയുടെ പ്ളാറ്റ്ഫോമിൽ തന്നെയാണ് പുതിയ ഫോർച്യൂണറിന്റെ നിർമ്മാണം. മനോഹരവും കരുത്തുറ്റതുമായ ടൊയോട്ട ന്യൂ ജനറേഷൻ ആർക്കിടെക്ചർ (ടിഎൻജിഎ) പ്ളാറ്റ്ഫോമാണിത്. യാത്രാസുഖത്തോടൊപ്പം ഡ്രൈവിംഗ് മികവും മെച്ചപ്പെട്ട സുരക്ഷയുമാണ് ഈ പ്ളാറ്റ്ഫോമിന്റെ മുഖമുദ്ര
പഴയ ഫോർച്യൂണറിനേക്കാൾ 90 എം എം നീളമുണ്ട് പുതിയതിന് . 15 എം എം വീതിയും കൂടിയിട്ടുണ്ട് . എന്നാൽ ഉയരത്തിൽ അൽപ്പം കുറവ് വരുത്തിയിട്ടുണ്ട് . 15 എം എം . കെട്ടിലും മട്ടിലും കൂടുതൽ സൗന്ദര്യവും ക്രോമിന്റെ മനോഹാരിതയും പുതിയ ഫോർച്യൂണറിനെ ഇഷ്ടവാഹനമാക്കുമെന്നുറപ്പ് . വലിയ ടച്ച് സ്ക്രീനും തുകൽ സീറ്റുകളുടെ മൃദുലതയും ഉൾവശത്തെ സമൃദ്ധമാക്കിയിട്ടുമുണ്ട്.
ഫോർ വീൽ ഡ്രൈവ് ഇച്ഛാനുസരണം തെരഞ്ഞെടുക്കാം. 148 ബിഎച്ച്പി 2.4 ലിറ്റർ 2ജിഡി-എഫ് ടി വി , 2.8 ലിറ്റർ 177 ബി എച്ച് പി 1 ജിഡി എഫ് ടിവി ഡീസൽ വേരിയന്റുകൾക്കൊപ്പം 2.7 ലിറ്റർ പെട്രോൾ വേരിയന്റും ലഭിക്കും. 6 സ്പീഡ് ഗിയർബോക്സ് ആട്ടോമാറ്റിക്കും മാനുവലും ലഭിക്കും .
ഇലക്ട്രിക്കലി ക്രമീകരിക്കാവുന്ന ഡ്രൈവർ സീറ്റ് , ട്രാക്ഷൻ കണ്ടോൾ സിസ്റ്റം , ഡൗൺഹിൽ അസിസ്റ്റ് കണ്ടോൾ സിസ്റ്റം ഉൾപ്പെടെയുള്ള ആധുനിക സൗകര്യങ്ങൾ പുതിയ ഫോർച്യൂണറിൽ ഉൾപ്പെടുത്തിയിട്ടുണ്ട്. 28 ലക്ഷം മുതൽ 32 ലക്ഷം വരെയാണ് വില പ്രതീക്ഷിക്കുന്നത്.