മുംബൈ: റിസര്വ്വ് ബാങ്ക് ഗവര്ണറായി ഉര്ജിത് പട്ടേലിനെ കേന്ദ്രസര്ക്കാര് നിയമിച്ചു. അടുത്ത മാസം നാലിന് സ്ഥാനമൊഴിയുന്ന രഘുറാം രാജന് പകരമാണ് നിയമനം. നിലവില് റിസര്വ്വ് ബാങ്ക് ഡെപ്യൂട്ടി ഗവര്ണറാണ് 52 കാരനായ ഉര്ജിത് പട്ടേല്.
ലണ്ടന് സ്കൂള് ഓഫ് ഇക്കണോമിക്സില് നിന്നും സാമ്പത്തിക ശാസ്ത്രത്തില് ബിരുദമെടുത്ത ഊര്ജിത് പട്ടേല് വാഷിംഗ്ടണിലെ യാലി സര്വ്വകലാശാലയില് നിന്ന് പിഎച്ച്ഡിയും കരസ്ഥമാക്കി. ഉര്ജിതിന്റെ നിയമനം സംബന്ധിച്ച ശുപാര്ശ ഇതിനായുളള മന്ത്രിസഭാ സമിതി അംഗീകരിച്ചു.
2013 ലാണ് ആര്ബിഐയുടെ തലപ്പത്ത് അദ്ദേഹം എത്തുന്നത്. ഡെപ്യൂട്ടി ഗവര്ണര് പദവിയില് ആദ്യ ഊഴം പൂര്ത്തിയാക്കിയതിനെ തുടര്ന്ന് കഴിഞ്ഞ ജനുവരിയില് അദ്ദേഹത്തിന് ഒരു തവണ കൂടി കാലാവധി നീട്ടി നല്കിയിരുന്നു. അതിനിടയിലാണ് പുതിയ പദവി അദ്ദേഹത്തെ തേടിയെത്തിയത്.
സ്ഥാനമൊഴിയുന്ന ഗവര്ണര് രഘുറാം രാജന്റെ വിശ്വസ്തനായിട്ടാണ് ഉര്ജിത് പട്ടേല് അറിയപ്പെടുന്നത്. രാജ്യത്തെ പണപ്പെരുപ്പം നിയന്ത്രിക്കാനുളള മാര്ഗങ്ങള് നിര്ദ്ദേശിക്കുന്നതിനും ധനനയ രൂപീകരണത്തില് പിന്തുടര്ന്ന പരമ്പരാഗത രീതികള് പൊളിച്ചെഴുതുന്നതിലും വലിയ പങ്ക് വഹിച്ച വ്യക്തിയാണ് ഉര്ജിത് പട്ടേല്.