സൂപ്പർ സ്റ്റാർ രജനീകാന്തിന്റെ പുതിയ ചിത്രമായ കബാലിയുടെ വിശേഷങ്ങളാണ് എങ്ങും. ചിത്രം പുറത്തിറങ്ങും മുമ്പ് തന്നെ തെന്നിന്ത്യ ന് സിനിമയുടെ പല റെക്കോർഡുകളും തിരുത്തിക്കുറിച്ച് കഴിഞ്ഞു. എന്നാൽ ആരാധരെയും അണിയറ പ്രവർത്തകരേയും ആശങ്കയിലാഴ്ത്തുന്ന വാർത്തയാണ് ഇന്ന് പുറത്തുവന്നിരിക്കുന്നത്.
ഈ മാസം 22ന് തിയേറ്ററുകളിലെത്താനിരിക്കെ ഡൗൺലോഡ് വെബ്സൈറ്റായ ടൊറന്റ് വെബ്സൈറ്റുകളിൽ സിനിമ പ്രചരിച്ചതായുള്ള വാർത്തകളാണ് ആരാധകരേയും ചിത്രത്തിന്റെ അണിയറപ്രവർത്തകരേയും ഒരു പോലെ ആശങ്കയിലാഴ്ത്തിയത്. സെന്സർ കോപ്പിയാണ് ഇത്തരത്തിൽ പ്രചരിച്ചതെന്നാണ് സൂചന. പല സൈറ്റുകളും ഇതിന് ഡൗൺലോഡ് ലിങ്കുകളും നൽകിയിരുന്നു.
ചിത്രം അനധികൃതമായി ഡൗൺലോഡ് ചെയ്യുന്ന വെബ്സൈറ്റുകൾക്കെതരിരെ നടപടി സ്വീകരിക്കണമെന്നാവശ്യപ്പെട്ട് നിർമ്മാതാക്കൾ കോടതിയെ സമീപിച്ചിരുന്നു. തുടർന്ന് ഇന്റർനെറ്റ് വഴി ഡൗൺലോഡ് ചെയ്യുന്നതിന് മദ്രാസ് ഹൈക്കോടതി ഇടക്കാല നിരോധനവും ഏർപ്പെടുത്തിയിരുന്നു.ഇതിനിടയിലാണ് സെന്സർകോപ്പി ചോർന്നെന്ന വാർത്ത പുറത്തുവന്നിരിക്കുന്നത്.
റിലീസിന് മുമ്പേ ചിത്രം പുറത്തെത്തുന്നത് തടയാന് രജനി ആരാധകർ ബോധവത്കരണ സന്ദേശവുമായി കഴിഞ്ഞ ദിവസം ഫ്ലാഷ് മോബ് നടത്തിയിരുന്നു. പാ രഞ്ജിത്ത് സംവിധാനം ചെയ്ത കബാലി രജനീകാന്തിന്റെ നൂറ്റി അമ്പത്തിയൊമ്പതാമത് ചിത്രമാണ്. വിതരണാവകാശമുള്ള റൈറ്റുകൾ വിൽപന നടത്തിയതിലൂടെ 200 കോടി ക്ലബിൽ കടന്ന ചിത്രം ഇതിനകം പല റെക്കോർഡുകളും തിരുത്തിക്കുറിച്ച് കഴിഞ്ഞു.