റിയോഡി ജനീറോ ; ഒളിമ്പിക്സിൽ പങ്കെടുക്കാൻ യോഗ്യത നേടുന്ന ആദ്യ ഇന്ത്യൻ ജിംനാസ്റ്റ് എന്ന ബഹുമതി ദീപ കർമാക്കർക്ക് സ്വന്തം . യോഗ്യതാ മത്സരത്തിൽ ഉജ്ജ്വല പ്രകടനം കാഴ്ചവച്ചാണ് ദീപ ഈ ചരിത്രനേട്ടം സ്വന്തമാക്കിയത്. 52.698 പോയിന്റാണ് ദീപ യോഗ്യത മത്സരത്തിൽ നേടിയത്.
സ്വാതന്ത്ര്യത്തിനു ശേഷം 11 ഇന്ത്യൻ പുരുഷ താരങ്ങൾ മാത്രമാണ് ഒളിമ്പിക്സ് ജിംനാസ്റ്റിക്കിൽ പങ്കെടുക്കാൻ യോഗ്യത നേടിയത്. 1952 ൽ രണ്ടു പേരും , 1956 ൽ മൂന്നു പേരും 1964 ൽ ആറു പേരുമാണ് പങ്കെടുത്തത് . പിന്നീട് 52 വർഷങ്ങൾക്കു ശേഷമാണ് ഒരു ഇന്ത്യൻ താരത്തിന് ജിംനാസ്റ്റിക്കിൽ പങ്കെടുക്കാൻ കഴിയുന്നത്.
2014 ഗ്ളാസ്ഗോയിൽ നടന്ന കോമൺവെൽത്ത് ഗെയിംസിൽ വെങ്കലമെഡൽ നേടിയ ദീപ കഴിഞ്ഞ നവംബറിൽ നടന്ന ലോക ചാമ്പ്യൻഷിപ്പിന്റെ ഫൈനൽ റൗണ്ടിലും ഇടം നേടിയിരുന്നു . ത്രിപുരയിലെ അഗർത്തല സ്വദേശിനിയാണ് ഈ 22 കാരി.