ന്യൂഡല്ഹി: ധനമന്ത്രി അരുണ് ജെയ്റ്റ്ലി അവതരിപ്പിച്ച പൊതുബജറ്റില് ആരോഗ്യമേഖലയ്ക്കും അടിസ്ഥാന സൗകര്യ വികസനത്തിനും പ്രാമുഖ്യം. രാജ്യത്തെ എല്ലാ പൗരന്മാര്ക്കും ഒരു ലക്ഷം രൂപയുടെ ഇന്ഷുറന്സ് പരിരക്ഷ വാഗ്ദാനം ചെയ്യുന്ന ബജറ്റില് റോഡ് ഗതാഗതം ഉള്പ്പെടെയുളള അടിസ്ഥാന സൗകര്യ മേഖലയ്ക്കും മുന്ഗണന നല്കിയിട്ടുണ്ട്.
ജനറിക് മരുന്നുകളുടെ വിതരണത്തിനായി പ്രധാനമന്ത്രി ഔഷധി യോജനപ്രകാരം 3000 മെഡിക്കല് സ്റ്റോറുകള് ആരംഭിക്കും. ദേശീയ ആരോഗ്യദൗത്യത്തിന്റെ ഭാഗമായി എല്ലാ ജില്ലാ ആശുപത്രികളിലും ഡയലാലിസിസ് സെന്ററുകള് ആരംഭിക്കാനുളള നിര്ദ്ദേശം പാവപ്പെട്ട ലക്ഷക്കണക്കിന് രോഗികള്ക്ക് ഗുണകരമാകും. ഡയാലിസിസിനുള്ള ചെലവ് കുറയ്ക്കുന്നതിന് പുറമേ എല്ലാവര്ക്കും ഈ ചികിത്സാസൗകര്യം ഉപയോഗപ്പെടുത്താനും നിര്ദ്ദേശം പ്രാവര്ത്തികമാകുന്നതോടെ സാധിക്കും. മാത്രമല്ല വിദേശത്ത് നിന്ന് ഇറക്കുമതി ചെയ്യുന്ന ഡയാലിസിസ് ചികിത്സാ ഉപകരണങ്ങള്ക്ക് കസ്റ്റംസ്, എക്സൈസ് അടിസ്ഥാന നികുതികള് ഒഴിവാക്കാനുളള പ്രഖ്യാപനവും ശ്രദ്ധേയമാണ്.
നടപ്പുസാമ്പത്തിക വര്ഷം 10,000 കിലോമീറ്റര് ദേശീയ പാതയും 50,000 കിലോമീറ്റര് സംസ്ഥാന പാത പൂര്ത്തിയാക്കുമെന്നും ബജറ്റില് വ്യക്തമാക്കുന്നു. റോഡ്, റെയില് മേഖലയുടെ വികസനപ്രവര്ത്തനങ്ങള്ക്ക് മാത്രം മാറ്റിവെച്ചിരിക്കുന്നത് 2,18,000 കോടി രൂപയാണ്. ഇതില് റോഡുകളുടെ അടിസ്ഥാന വികസനത്തിന് മാത്രം 55,000 കോടി രൂപയാണ് വകയിരുത്തിയിരിക്കുന്നത്. സംസ്ഥാന സര്ക്കാരുകളുമായി ചേര്ന്ന് വിമാനത്താവളങ്ങളുടെ വികസനത്തിനായി പ്രവര്ത്തിക്കും. അന്പത് കോടി മുതല് 100 കോടി രൂപ വരെ ചെലവിട്ട് 160 എയര്പോര്ട്ടുകളും എയര്സ്ട്രിപ്പുകളും നവീകരിക്കുമെന്നും ബജറ്റില് വ്യക്തമാക്കുന്നു.
ഊര്ജ്ജോല്പാദനത്തിനുള്ള സ്രോതസ്സുകള് കൂടുതല് വിപുലപ്പെടുത്തേണ്ടതുണ്ടെന്ന് ബജറ്റില് സൂചിപ്പിക്കുന്നു. ആണവോര്ജ്ജ ഉല്പാദനത്തിനായി 3000 കോടി രൂപ നീക്കിവെച്ചിട്ടുണ്ട്. ആണവോര്ജ്ജം ഫലപ്രദമായി ഉപയോഗിക്കുന്നതിനായി അടുത്ത 20 വര്ഷത്തേക്കായി പ്രത്യേക രൂപരേഖ സര്ക്കാര് തയ്യാറാക്കുമെന്നും ജെയ്റ്റ്ലി പറഞ്ഞു. ആഴക്കടലില് നിന്നും ഉയര്ന്ന താപനിലയുളള പ്രദേശങ്ങളില് നിന്നുമുളള വാതക ഉല്പാദനത്തിന് പ്രത്യേക ഇന്സെന്റീവ് അനുവദിക്കാനും ബജറ്റില് നിര്ദ്ദേശിക്കുന്നു.