കൊച്ചി: ഇരുമ്പനം ഐഒസി പ്ലാന്റില് ടാങ്കര് ലോറികള് അനിശ്ചിതകാല സമരം ആരംഭിച്ചു. പുതിയ കരാര് വ്യവസ്ഥകള് റദ്ദുചെയ്യണമെന്ന് ആവശ്യപ്പെട്ടാണ് സമരം. ടാങ്കര് ലോറി ഉടമകളും തൊഴിലാളികളും വിതരണക്കാരും ചേര്ന്നുള്ള കോര്ഡിനേഷന് കമ്മറ്റിയുടെ നേതൃത്വത്തിലാണ് സമരം.
എറണാകുളം ജില്ലാ കളക്ടറുടെ നേതൃത്വത്തില് മൂന്നുതവണ നടന്ന ചര്ച്ചയും പരാജയപ്പെട്ടതോടെയാണ് അനിശ്ചിതകാല സമരം ആരംഭിച്ചത്. ടാങ്കറുകളുടെ എണ്ണം 68 ല് നിന്ന് വെട്ടിച്ചുരുക്കിയ നടപടിയും ഓവര്സ്പീഡ് സെന്സര് എന്ന ടാങ്കറിലെ പരിശോധനാ സംവിധാനം ഉടമകള് ഒരുക്കണമെന്ന നിര്ദ്ദേശവും റദ്ദുചെയ്യണമെന്നാണ് സമരക്കാരുടെ ആവശ്യം. ഓവര്സ്പീഡ് സെന്സര് സംവിധാനം ഒരുക്കാന് മൂന്നര ലക്ഷം രൂപ വേണ്ടിവരുമെന്നും സമരക്കാര് ചൂണ്ടിക്കാട്ടുന്നു.
പുതിയ കരാര് പ്രകാരം കഴിഞ്ഞ വര്ഷത്തെക്കാള് ടാങ്കര് വാടകയില് 20 ശതമാനം കുറവുണ്ടായതായും ടാങ്കര് ഉടമകള് പറയുന്നു. സമരം തുടര്ന്നാല് തെക്കന് ജില്ലകളിലേക്കുളള പാചകവാതക വിതരണം പ്രതിസന്ധിയിലാകും.