ന്യൂഡല്ഹി: ആം ആദ്മി പാര്ട്ടിക്ക് ലഭിച്ച സംഭാവന തുകയില് അസ്വാഭാവിക വര്ധന. 2014-15 വര്ഷം പാര്ട്ടിക്ക് ലഭിച്ച സംഭാവനയില് മുന്വര്ഷത്തെ അപേക്ഷിച്ച് 275 ശതമാനത്തിന്റെ വര്ധനയാണ് ഉണ്ടായത്. അസോസിയേഷന് ഫോര് ഡെമോക്രാറ്റിക് റിഫോംസ് എന്ന സംഘടനയാണ് ഇത് സംബന്ധിച്ച വിവരം പുറത്തുവിട്ടത്.
ദേശീയ പാര്ട്ടികള്ക്ക് പോലും സംഭാവനയിലെ ശരാശരി വര്ധന 151 ശതമാനം ആണെന്നിരിക്കെയാണ് എഎപിയുടെ സംഭാവനയില് അത്ഭുതാവഹമായ ഉയര്ച്ച കണ്ടത്. കഴിഞ്ഞ സാമ്പത്തിക വര്ഷം 44.71 കോടി രൂപയാണ് സംഭാവനയിനത്തില് മാത്രം എഎപിയ്ക്ക് ലഭിച്ചത്. ഇതില് 25 ശതമാനത്തോളം പണം വിദേശ രാജ്യങ്ങളില് നിന്നാണ് എത്തിയത്. എന്നാല് സംഭാന നല്കിയവരില് 111 പേരുടെ വിവരങ്ങള് വെളിപ്പെടുത്താന് ഇതുവരെ അരവിന്ദ് കെജ്രിവാളിന്റെ പാര്ട്ടി്ക്കായിട്ടില്ല. 91.47 ലക്ഷം രൂപയാണ് ഇവര് നല്കിയത്.
മഹാരാഷ്ട്രയില് നിന്നും ഡല്ഹിയില് നിന്നുമാണ് പാര്ട്ടിക്ക് കൂടുതല് സംഭാവന ലഭിച്ചത്. എഎപി യില് ജനാധ്യപത്യം ഇല്ലെന്നും, സാമ്പത്തിക കാര്യങ്ങളില് സുതാര്യത ഇല്ലെന്നും ആരോപിച്ചാണ് സ്ഥാപക നേതാക്കളായ പ്രശാന്ത് ഭൂഷണും യോഗേന്ദ്രയാദവും നേരത്തെ പാര്ട്ടി വിട്ടത്.
അഴിമതിയ്ക്കും, കളളപ്പണത്തിനും എതിരെ നിലപാട് എടുത്തു കൊണ്ടാണ് ഒരു വര്ഷം മുന്പ് കെജ്രിവാള് സര്ക്കാര് അധികാരത്തിലെത്തുന്നത്. എന്നാല്, ഭരണം ആരംഭിച്ച ശേഷം ഈ നിലപാടുകളില് നിന്നും പാര്ട്ടി വ്യതിചലിച്ചുവെന്ന ആരോപണം ശക്തമാണ്. ഇതിന് പിന്നാലെയാണ് ഈ ആരോപണത്തെ സാധൂകരിക്കുന്ന തരത്തില് ഇത്തരം കണക്കുകള് പുറത്തുവരുന്നതും. ലഭിച്ച സംഭാവനകളുടെ സ്രോതസ് വെളിപ്പെടുത്താന് പാര്ട്ടിക്ക് സാധിക്കാത്തത് പൊതുജനങ്ങള്ക്കിടയിലും സംശയം ജനിപ്പിച്ചുകഴിഞ്ഞു.